Uit die staanspoor triomfgetrommel: laasgeborene, daarná

tussen kwispelende susters en ‘n aanbiddende ma,

trotse erfgenaam van die patriargale vonk

met oordadig stralende ego wat stemmingsvol pronk.

Vergesel van ‘n onweerlegbaar goedige riktus* die tydige woordjie gerig aan ondergeskiktes

– dit wil sê byna iedereen – wat die rangordening beklink,

graaggelowiges magnetiseer wat hul gretig verbeel

dat húlle ook sy geseënde afglans mag deel

en die roekelose kans om trou daartoe by te dra

vanaf hierdie oomblik as soetste vervulling vra.

(Wie by ryper insien straks in dié roeping versuim

word ferm en vriendelik en herrieloos weggeruim,

kom êrens tereg, waarskynlik nie blywend vermink).

 

Pluk die dag word met die grootste gemak omgeset

in pluk alles wat enigsins binne bereik kom en let

veral op die lot van dié wat gelate wag

op wat ‘n bedeling versprinkel. Pluk met gesag.

 

Kan die honger na méér ‘n man ophits om só te leef?

Ja, dink hoeveel neonbeklemtoonde eer daaraan kleef,

dink ook aan die Engelse Oorlog: die seerste gemis

word pas deur gedrewe nakomelinge uitgewis.

Met derglike sterre mag ons vaderland blink

tot ‘n nuwe gety van vereffening hulle versink.

O die volmaakte saaklikheid van hiernamaalsvrye kremasie:

verdriet wordt gesteriliseer, herinnering programmaties verwerk,

die verlede rookloos verteer.

Later sal ons dit oor ons hart kry om te treur,

nou verstram ons tot outomate

eendragtig in massaverraad.

Op pad huis toe – diep in gedagte, opgelug en beskaamd –

raak ons boonop hopeloos verdwaal.

In die sondronk verwarring ontdek

ons die Nachtwachtlaan, nooit van gehoor,

vóór die volgende brug moet ons keer

om beter op bakens te let

wat lei na ons aardse verblyfplek

waar die naklank van jou lag

plotseling tóg word gered.

In die windlose, wasige vroegoggendlig

staan die borne op die oorkantse wal

in verleë afsydigheid gehul.

Maar kyk, die metaalgladde watervlak stal

hulle onderstebo arabeskhelder uit,

aan onsigbare haarwortels hang hul gewig

met splitsende takwerk sekuur ingevul.

Op gietstaal die gitswart bevestiging

van ongedeerde identiteit:

afbeelding oortref weer die werklike ding.